教小朋友理財,除咗要佢哋知道工作係賺取金錢嘅方法,都要佢哋知道創業、做生意賺錢都係另一種方法。有次小編同啲小朋友講下創立一門生意,從產品、店舖設計、營業時間、店舖位置、目標顧客群、市場推廣及策劃等方面,去探討做生意嘅營商策略同埋潛在風險。
有一組小朋友好有創意、好有計仔,諗住開間雪糕店,店內嘅主打產品係只賣來自日本士多啤梨嘅雪糕,因為佢哋覺得日本嘅士多啤梨品質比較好,又有綽頭,應該可以帶嚟熱潮。有小朋友問,如果士多啤梨嘅來源只係從日本,假如士多啤梨失收,又或者產地遇上各種大自然災害,咁你哋會點呢?有其他組嘅同學就問,咁如果啲顧客嘅朋友唔鍾意食士多啤梨,咁你哋啲生意咪少咗囉?同學嘅問題非常有邏輯,不無道理。我哋都有建議啲同學應付以上嘅問題,可以從原材料嘅產地、供應商、產品種類、口味等方面著手,制定面對各種業務風險的方法及對策,減少大部份可以預計嘅風險。等佢哋知道風險雖不能完全避免,但透過仔細周詳嘅規劃,風險係可以喺自己掌握之中,更重要係培養面對風險應有嘅正確態度。

Leave a Reply

Your email address will not be published.