好多家長朋友都會問幾歲先應該俾零用錢小朋友,有啲會覺得小朋友太細,喺學校用錢嘅機會又唔多,而且又有八達通應急,所以唔需要太早俾;有啲會睇就讀嘅小學有冇小賣部或者自行在外用餐/買文具等需要。
零用錢要幾時開始俾、俾幾多、點樣俾,要視乎每個小朋友同埋屋企嘅經濟情況。但係小編有以下嘅睇法,大家不妨參考一下呢幾個大原則。

幾歲俾?「早俾早體驗」
越早俾零用錢小朋友,佢哋就可以越早接觸到錢,越早有學習管理金錢嘅機會,體驗生活。家長可能會擔心小朋友太早有錢會亂買野,但係其實每一次錯誤都係一個學習嘅機會,細個嘅時候無習慣選擇性審慎消費,唔通等佢出嚟做嘢賺錢先嚟做月光族、欠下巨額卡數?針唔拮到肉唔知痛,小時候碰釘機會越多,成長亦越快,

俾幾多?
小編建議要先將小朋友在上學日嘅必要開支(例如車費、膳食、基本文具等)同零用錢分開,即係話佢唔需要用零用錢去買一啲佢需要嘅嘢,而零用錢只係用嚟買啲佢想要嘅嘢。零用錢可以按照上課日數、或全星期去俾,金額多少並不重要,亦要同小朋友講唔需要同其他同學比較,因為每個家庭嘅經濟環境唔同,有啲同學其實可能需要用部份零用錢購買必要用品、膳食等。

更重要嘅反而係要了解、觀察佢哋嘅消費習慣同埋模式。假設小朋友全星期嘅零用錢只有$20,但係竟然會問同學借多$5購買想要嘅卡通文具去滿足自己嘅購買慾望。雖然$5並唔係大數目,但係背後意義重大,久而久之養成壞嘅理財習慣:
一、沒有作出預算、選擇性消費,唔清楚自己手上嘅資源有限;
二、先使未來錢,未賺錢已經先借錢消費;
三、唔識延遲享樂,俾心魔支配理性思考

點樣俾?
1. 俾零用錢要定時定額
大人返工出糧都要定時定額啦,小朋友零用錢都一樣,等佢哋知道即使慾望、想要嘅玩具有好多,但係事實係自己嘅資源係有限嘅,唔可以話想要咩就買咩,要學會等待,諗辦法多賺零用錢,或者作出理性嘅消費選擇。

2.「真金白銀」最實在
小編不太建議用電子貨幣(如八達通)增值形式俾零用錢,因為付錢時冇接觸實體錢,冇乜肉痛嘅感覺,較難記得自己用咗幾多錢。

3. 約法三章:學習記帳、做預算
俾零用錢都要約法三章,規定小朋友要學習記帳、定下目標,每領取零用錢後預算部分做儲蓄、消費等,並記低每個消費項目。但不建議家長過分控制每項預算嘅比例,重點反而係要經常同佢跟進儲蓄嘅進度,同埋要量入為出。

Leave a Reply

Your email address will not be published.