喺ATM用乜卡撳錢?用錯卡隨時撳錢變借錢

好多小朋友都有跟隨父母去銀行ATM提款嘅經驗,只需要將一張卡放入去部提款機,撳幾個制,一張張銀紙就會自動喺部機吐出,對小朋友來講提款機就好似印鈔機咁樣,要幾多有幾多,咁係因為佢哋唔知道ATM同銀行嘅運作,鈔票嘅由來,同埋錢係有限資源嘅概念。喺ATM可以接受提款嘅卡越來越多,小朋友必須清楚用每一張卡撳錢背後嘅意義。

提款卡:銀行發行嘅戶口卡,只要戶口內嘅現金戶口存款多過提款機最少可以提出嘅金額,就可以提取現金,係一種量入為出嘅概念,戶口沒有結餘就不能再提取現金。

信用卡:好多年前,銀行已經容許客戶將自己嘅現金戶口連結喺信用卡內,即係只要攜帶一張信用卡,既可以用來消費購物,又可以喺ATM提取戶口內現金。但係提款時必須選擇正確嘅戶口號碼,如果唔係就會變成喺信用卡戶口提款,亦即係用信用卡現金透支(向銀行借貸),利息極高,隨時撳錢變借錢。

扣賬卡:扣賬卡通常與銀行提款卡結合,既可以喺ATM提款,亦可以去購物。但係用扣賬卡消費嘅原理係量入為出,消費嘅金額會即時喺戶口內扣除,唔會先使未來錢,但當然自己亦要作負責任的理性消費。

除咗去銀行/ATM提款之外,我哋亦可以利用提款卡喺指定便利店/商戶提款,當然每次提款喺有上限嘅(最多$500),同埋要用該卡購物消費嘅要求(持長者卡人士在特定商戶提款除外)。呢種方法除咗方便咗顧客提款,其實對商戶嚟講亦都降低咗商舖儲存大量現金帶嚟嘅保安風險。

話說小編多年前出嚟社會做事,冇幾耐就喺一向都有儲蓄戶口嘅銀行申請咗張信用卡,貪佢可以邊消費,邊賺取里數。無獨有偶,嗰張信用卡同銀行提款卡嘅設計極為相似,而且一張深藍色、一張黑色,喺燈光暗嘅環境底下,都幾難分得清邊張打邊張。

有一日去銀行櫃員機撳錢,好衰唔衰,錯手放入左張信用卡,咁啱之前預先設定嘅密碼同提款咭嘅又一樣,成個過程就同平時撳錢一模一樣。幾個禮拜之後,上網睇到張信用卡月結單先恍然大悟,原來之前連番嘅巧合、失誤,原本只不過想撳$1000,就變成咗用信用卡現金透支,才不過幾星期時間,連現金透支手續費、貸款利息等,共欠款已超過$1150。

當時馬上致電信用卡中心「自首」,幾經波折後銀行終於念著小編係老顧客,將嗰次現金透支手續費及利息全數豁免,但下不為例。希望大家都引以為戒,撳錢時要打醒十二分精神,免得將撳錢變成現金透支。
註:用信用卡現金透支是沒有免息還款期的,即係話貸款利息會係提取時即時生效,而且每日計息直到全數金額繳清為止。

下次同小朋友去撳錢不妨多作提問,提起佢哋對金錢運作嘅興趣。

Leave a Reply

Your email address will not be published.