【理財態度與行為】如果沒有實體錢,對兒童理財教育有咩影響?

早前睇到報道話瑞典很可能在未來五年間全面取消實體錢,即係全國各商店都會用電子貨幣來作交易,唔再收實體錢。聽落覺得科技非常之先進,為社會上各個持份者(如店舖、消費者、分銷商等)帶來方便,營運成本下降亦將會反映喺物價上面。如果市面上已經再沒有實體錢(硬幣、紙幣),以下嘅概念同東西亦都會隨之而消失:
一、找續。每次消費購物時只需要從信用卡、電子錢包入面直接扣取購物單上嘅款項,唔會有餘額嘅概念,所以店商並唔需要找錢。
二、到銀行ATM提款。聽落真係幾方便,每次購物嘅時候都唔使驚因為唔夠錢而帶來不便,當然前提係你嘅戶口一定要有錢啦!
三、豬仔錢甖、零錢包。錢甖、散錢包第時只會喺博物館出現,屋企嘅神沙(零錢)、紙幣亦只會隨時變成裝飾品、收藏品。
四、外幣找換店。旅客來港或我哋外遊時已不再需要兌換現金,外幣找換嘅實體店將會絕跡,由網上外匯平台取代。
但係社會全面無現金化對兒童理財教育嘅影響又會係點呢?

我哋細個學理財就係用豬仔錢甖將一個一個硬幣慢慢累積,聚沙成塔,儲錢效果可以透過豬仔錢甖嘅重量、搖一搖聽下錢甖入邊嘅聲,好容易形象化地感受到自己辛苦努力後嘅成果。再加上錢甖嘅外殼令到儲嘅錢有入冇出,唔容易隨便拎錢出嚟消費,更加可以抵抗外來嘅同埋心魔嘅誘惑。

如果沒有實體錢,對小朋友來講儲蓄只會係一個數字遊戲,因為付款方法變得更加方便,俾錢嘅過程變得「無形、無痛」,唔太需要思考,少啲定力嘅小朋友只要電子錢包內有錢,見到鍾意嘅嘢就買,儲蓄嘅效果只會反應係數字上嘅轉變,小朋友唔會具體地、真實地感受到。

金融科技進步嘅同時,兒童理財教育亦應該與時並進。小朋友唔單只要學識乜嘢係電子錢包/電子貨幣,習慣每次消費嘅時候睇清楚扣款金額同埋電子錢包餘額是否正確,更重要係學會理財嘅基本功-先儲蓄,後理性地消費,分清需要和想要,利用科技去幫手做好預算同埋記帳,為日後嘅價值觀打好基礎。同時亦都要加強小朋友對金融科技犯罪、電子錢包保安、網上詐騙行為等方面嘅意識。

Leave a Reply

Your email address will not be published.