之前都同大家講過理財係包括三個範疇:理財知識、理財態度、理財行為。而理財態度往往為人所忽略,理財態度其實係指一個人會唔會現在有計劃咁為將來要用錢嘅時候作出犧牲,亦即係會唔會用當下有嘅錢去及時行樂,而沒有為將來作好長遠嘅打算。小編認為理財態度係三個範疇入面最重要亦係最難教,而且必須要越細訓練越好。有時啲家長覺得,唔通次次去購物消費嘅時候都要佢比較嗰一角幾毫咩,慳埋慳埋啲錢都唔會幫我買到樓啦,反而可能俾小朋友覺得自己好計較,計得太盡。小編經常強調,教理財唔係淨係要教小朋友慳得一蚊得一蚊,反而要灌輸俾小朋友購物嘅時候要作出比較,貨比三家,喺眾多廣告耳濡目染嘅情況底下,挑選自己真正需要,而且符合自己嘅預算,從小喺細至買日用品,到大個嘅時候要買各樣嘅理財投資產品,都可以作出精明嘅選擇。舉個例子,小朋友扭計想買玩具嘅時候,家長可以用呢個機會同佢分析延遲享樂的概念,例如將買玩具嘅錢儲起,而且作出適當嘅投資,他日財富就會增值,可以用來完成較大嘅夢想,例如去旅行。咁樣可以令到小朋友諗下自己嘅將來,而唔係淨係活在當下,及時行樂。

Leave a Reply

Your email address will not be published.