【理財態度】當你每日返工朝九晚X做到無停手,原來小朋友覺得打工係……

香港人工時長「有返工冇收工」可以話係享負盛名,一眾在職父母往往因為咁,經常被迫推遲回家時間,有時雖然人在家中,但魂魄仍在公司,變相減少親子時間和降低親子相處時的質素。唔少在職父母都一廂情願咁希望子女明白父母工作辛苦,賺錢艱難,有啲父母更安排子女參加不同機構舉辦的職場體驗坊,一方面希望子女對自己的興趣及各行各業有所了解,另一方面亦希望子女了解及體諒父母工作的辛勞。殊不知小朋友同我哋分享,話一啲都感受唔到打工嘅辛苦,仲覺得職場體驗坊中嘅「工作」好簡單、好容易,毫無難度,所以認為打工一啲都唔辛苦。

當然工作體驗日嘅主要目的通常只係俾小朋友認識唔同工作嘅種類、性質,以趣味行先,但就原來俾咗小朋友一個錯覺,覺得打工一啲都唔辛苦。小朋友唔覺得打工辛苦,自然就體諒唔到父母打工賺錢嘅艱苦,亦未必學會珍惜金錢和父母所提供的一切。所以小朋友自小學習及體驗「錢是靠工作賺來」的概念,在學習理財的路上尤其重要。

Leave a Reply

Your email address will not be published. Required fields are marked *