答:首先,我哋要搞清楚點解要去外國讀書先?可以學習獨立?轉換下新環境?認識唔同國籍嘅朋友?外國先有呢一科?想有好嘅語境(即是喺全外語嘅環境下生活)?為咗逃避香港嘅壓力?想日後搵份好工?定還是好鍾意去呢個地方旅行呢?以上呢啲理由可能未必係你嘅答案,不過,我哋應該諗清楚個原因先。如果純粹係因為鍾意個地方,認為外國嘅月亮特別圓,咁就應該首先了解下個地方嘅文化,係咪同自己想像嘅一樣呢? 其實出國讀書嘅使費都係另一個重要嘅考量,例如昂貴嘅海外生學費(若冇獎學金)、住宿、每日三餐、交通費、交際費、機票等等。咁在外國讀完書後,係咪會繼續喺當地搵工作?定還是會返嚟香港搵工呢?如果係用學生貸款嘅話,咁外國留學返嚟之後又要用好幾年時間去還清貸款。當然係香港讀都需要還款,不過就相對地低啲。所以你覺得去外國係咪就一定好啲呢,咁就真係見仁見智嘞。