雖則話而家睇電視嘅人愈來愈少,但係真係唔好睇少電視廣告對小朋友嘅威力。嗰日同啲小朋友分享有關商業貸款嘅概念,啲學生二話不說已經可以隨口噏到幾間借貸公司,留意番唔係講緊銀行喎,而係可以清楚講得出嗰啲物業信貸公司同埋財務公司嘅名,仲話到俾我哋聽有啲信貸公司可以接受No Show貸款,而且佢哋仲知道向信貸公司借錢真係只需要身分證/電話號碼就已經可以,完全唔使露面添。無可否認,佢啲信貸公司嘅市場推廣確實係幾有效,有效到連小四嘅學生都識得呢啲信貸公司。小編唔係話要否定呢啲信貸公司嘅存在價值,的而且確可能幫到好多生意上需要錢周轉嘅人,但係諗深一層,你又有冇諗過咁細嘅小朋友知唔知向信貸公司借錢嘅代價,同埋向銀行借貸嘅分別呢?

呢啲廣告經常灌輸一啲借貸消費丶為咗實現自己去旅行或者創業嘅理想而借貸,你又係咪真係唔知道你個小朋友清楚借貸背後嘅代價係咩呢?實現當前嘅理想緊要,定係了解借貸嘅意義同代價緊要?