乜嘢係被動式開支?顧名思義,就係一啲每個月固定嘅開支,例如房租、水電煤氣費、孝親費/家用、保險費、強積金等,但係呢啲都係每個月嘅必須開支,無得避免。但係有一類嘅被動式開支就係屬於非必要嘅,例如高端健身會籍、遊艇會/哥爾夫球會會籍、尊貴美容護理計劃、最高端嘅家用/流動上網計劃、顯赫的專業/私人會所會籍、甚至養一架車等等,每當開始咗就成為了身分嘅象徵,每月繼續扣款,無形變成了恆常嘅負擔,亦即係債務。當大家教小孩想要、需要嘅分別時,亦都不妨檢視一下家庭嘅財務報表,睇吓有冇好多被動式開支,阻礙大家達到財務自由。

仲記得細個嘅時候,父母都會灌輸俾小編千祈唔好借人錢嘅訊息,當然細個嘅時候唔會點反駁,只係覺得借錢感覺不好,而且有啲罪惡感添。但係其實借貸係一門理財好重要嘅學問同埋技巧,因為就連個小朋友住緊嘅屋企都係要靠父母問銀行借貸,先至可以買得到。而父母亦都會經常喺小朋友面前用信用卡消費,都係問銀行借緊錢啦。所有達到財務自由嘅人同埋企業家都係要靠借貸先至可以成功,但係如果喺教小朋友理財嘅時候,對於借貸避而不談,到小朋友大個小小可以申請借貸產品嘅時候就可能會胡亂借貸,陷入財困。Read More →

嚟到第四篇啦,可能你會問其實真係需要咁早同小朋友講關於主動、被動收入咩?要小朋友知道賺取收入的方法不只一種,並唔係話打工、買樓就係唯一嘅出路,而係要為小朋友提供佢哋應有嘅理財教育同埋知識,等佢哋知道原來除咗打工賺錢之外,亦都可以考慮被動收入,等小朋友有比較全面嘅認識。佢日後嘅選擇喺掌握喺佢雙手,作為家長嘅責任就係要將佢應該知道嘅知識、教育提供俾佢,起碼佢知道有得揀,打工賺錢只不過係其中一種中庸嘅賺錢方法。Read More →

續上篇,主動收入同埋被動收入兩者各有千秋,分別主要喺工作上嘅自由度。打工賺取主動收入,必須按公司的規定上班工作,例如要在指定的時間回到辦公室上班、按照上司嘅要求完成工作,有時更要加班去完成工作,因為驚俾公司炒魷魚,會突然失去收入來源。可以向小朋友解釋點解爸爸媽媽成日都咁夜返,陪伴小朋友嘅時間好短,返工喺以時間、自由去換取薪金,借機會希望小朋友明白賺錢的辛苦,要珍惜佢哋擁有嘅一切。相反,被動收入喺靠投資分析及生意知識,借用別人的時間同金錢去換取財富及自由,因為即使喺你瞓覺嘅時候,被動收入都會幫你賺錢。Read More →

大家諗吓喺學習理財嘅時候,例如複式效應、月供平均成本法、製造被動收入、產生正現金流等,都會發覺相逢恨晚,自己太遲先學,如果細個早啲學就好嘞。有呢種諗法一啲都唔奇,由細至大,學校老師冇教,家長喺屋企冇講,去到出嚟打工賺錢先喺耳濡目染嘅情況下道聽塗說,嘥咗唔少時間。需知道理財投資最大嘅朋友係時間值,即使投放嘅資金唔多,只要透過時間同埋複式效應,再加上挑選適合的投資物,假以時日財富就會慢慢咁累積。一啲好基本嘅投資概念,例如複利息咁,其實係初中嘅數學堂都有教過,但係課堂學嘅只不過係運算、次方等部份,反而冇好好將個概念應用喺個人理財同現實生活中,白白浪費左寶貴嘅學習理財機會。學習理財永遠只有聽到人講後悔學得太遲,而唔會聽到人嫌學得太早,咁你個小朋友又開始咗學理財未呢?