【理財態度與行為】$100零用錢點樣分配?從理財行為睇出小朋友嘅個性

儲錢嘅基本概念,就係每次收到錢就先儲起一部份,然後再按自己實際需要作理性消費同埋捐獻。概念好簡單,但係必須從小培養儲蓄習慣。你估一班6至10歲嘅小朋友收到$100零用錢之後又會點樣分配、預算呢?

小編叫小朋友做零用錢分配時,刻意冇俾指引佢哋,而且強調並沒有標準答案,亦唔需要同其他人討論或作比較,因為每個人嘅選擇背後都有佢嘅原因,要彼此互相尊重。

小編綜合左小朋友嘅結果,將佢哋大致上分類為以下四類小朋友:

一:顧全大局派 (儲蓄40%,消費50%,捐獻10%)
呢類小朋友可以講係設想周到,將零用錢恰如其分咁分配係三個項目,為自己未來打算之餘,亦都不忘盡力幫助別人。

二:理性務實派 (儲蓄40%,消費60%,捐獻0%)
第二類小朋友都差唔多,但係就將捐獻部分撥入消費。其他小朋友就追問,點解你哋唔捐錢嘅?小朋友呆咗一呆,無言以對,小編即刻解畫,「其實要幫助別人有好多方法,而捐錢只係其中一種,做義工、參加探訪、賣旗籌款等都屬於幫助別人,每個人選擇幫人嘅方式都唔同,呢個係屬於個人選擇,沒有對與錯,我哋要互相尊重對方。」

的而且確,撫心自問,有幾多人真係可以做到每個月行常捐款?

 

 

三:愛心爆棚派(儲蓄20%,消費30%,捐獻50%)
有少數嘅小朋友選擇將一半零用錢捐俾有需要嘅人,包括老人、社會上有需要嘅人等,而每月消費就嚴格控制喺30%以下,儲蓄亦有20%。這類小朋友擁有比一般人多嘅「大愛」,賺錢除咗滿足自己嘅生活需要,亦以自己最大嘅能力去幫助社會上有需要的人,佢哋觀察入微,同理心同愛心都爆棚。

四:孝順父母派(儲蓄20%,消費30%,捐獻10%)
班上有一位小朋友嘅答案最有驚喜,佢將手上嘅道具銀紙諗咗好耐都唔知點樣分配好,等到班上其他小朋友都已經決定好,但係佢只係將手上嘅$60分配到儲蓄消費捐獻。小編即刻訪問吓佢,跟住佢就話,「$100太多啦我用唔晒,剩低嗰$40我會俾返爸爸媽媽,因為佢地返工好辛苦。」年紀輕輕就已經識得俾家用,相信佢父母知道之後一定會感到安慰。

大家不妨考考你嘅小朋友,睇下佢係屬於邊類性格,話唔定會得到意想不到嘅結果呢!

Leave a Reply

Your email address will not be published.