對於長期糧尾嘅月光族嚟講,想每個月儲到些少錢可以話係甚為艱難。前陣子我哋向一班初出茅蘆嘅年青人分享理財資訊,同佢哋一齊做個簡單活動,只要10分鐘就令佢哋自己悟出點解會長期糧尾,同埋自己學識逃出「困局」。

活動其實很簡單,只需要喺我哋提供嘅每月開支表上,回想過去一整日嘅消費項目,如膳食(早、午、晚餐、小食、下午茶、咖啡/茶飮)、交通等,將總數乘以一個月嘅日數,再加上每月其他恆常開支,如手機數據費用、娛樂、教育、孝親費、MPF、衣履等,就成為咗大約嘅每月總開支。將呢個數字同自己每月嘅薪金作比較,就知道自己每個月嘅財政狀況如何。

不難想像,嗰啲成日話自己儲唔到錢嘅,就發現咗竟然「使凸」,即係開支大過收入,亦即係食緊老本。要逃出「長期糧尾困局」,方法就係要逐一檢視每項開支,睇吓邊啲不必要開支可以逐步減少,又或者有冇其他平啲方法取代。出邊買一杯咖啡、茶飲,閑閑哋都成$30-$40,小數怕長計,如果自己喺屋企/公司炮製嘅話,長久下來就可以慳唔少。