小編今次分享一下最近教學童理財嘅個案。今次個學童大約13歲,近日唔小心跌爛咗部手機,仲諗住用利是錢買返部最新出嘅手機,大約要$3500左右。佢忐忑左好耐,雖然利是錢足夠可以買到新款手機,但係偏偏父母最多淨係俾佢買$1000以下嘅型號,面對兩難,小編就用以下幾個問題引導佢思考:

一、要維修個部跌爛咗嘅手機要幾錢?

👦🏻:雖然問嗰啲手機維修舖,話只需要$250去維修個跌爆咗嘅屏幕,但係部機真係有啲慢,都係時候要換部新嘅。

二、如果真係要買新手機,點解一定要買新款嗰個呢?

👦🏻:因為呢一款個屏幕大,記憶體較多,用嚟打機睇片聽音樂最好不過。

三、除咗買新手機,仲有冇其他方法?

👦🏻:唔⋯⋯

四、假如真係買咗部新款手機,但係又再唔小心跌爛咗,你會有啲咩感受呢?

👦🏻:唔會掛,我以後會小心啲㗎啦⋯⋯

FinKAB導讀:小編以上四個問題其實係想引導學童去作出多方面嘅思考,從而解決問題。第一步就係首先要佢明白到佢當前遇到嘅問題係乜嘢。佢嘅問題其實唔係唔夠錢買新手機,而係要如何修理好跌爛咗嘅手機屏幕。手機跌爛咗只要仲用得,經過維修更換新屏幕,問題就已經解決了,想換新款手機只不過係一個藉口,但並唔係要解決問題嘅唯一辦法。除咗買新手機、更換屏幕之外,其實仲可以考慮一啲使用狀態唔錯嘅二手手機。最後一個問題其實係想提醒佢再次代入情景,經歷一次跌爛一部新機嘅慘況。如果一炮過用晒啲利是錢去買一部全新嘅手機,一不小心再次跌爛,咁就真係喊都無謂啦。