回報越高,風險越大,呢個係必然嘅定律。
要教小朋友理財,其實都要慢慢灌輸一啲關於風險嘅知識俾佢哋。
點樣先令到一個八九歲嘅小朋友明白乜嘢係風險呢?當然就一定要從佢日常生活方面着手,例如可以問吓小朋友踩單車有啲乜嘢危險,可以叫佢想像下如果佢從來都未學過踩單車,第一次就踩兩輪單車,會發生啲乜嘢情況呢。又例如唔喺單車公園或有單車徑嘅地方踩單車,又會發生啲乜嘢事情呢。
風險就係一啲事情嘅不確定性,可以係正面亦可以係負面。喺沒有接受過正式訓練,或沒有防護裝備的情況之下,又或者喺唔適當嘅地方踩單車,其實係非常之危險嘅。

為咗減少因踩單車受傷嘅機會,小朋友要先學習使用三輪車,借助輔助輪去學習平衡力,慢慢習慣左之後就可以試踩兩輪單車。而且我哋會係一個設有單車徑嘅地點踩單車,以降低發生意外嘅機會;並且穿上護膝、頭盔及保護衣物,以減少一旦跌倒時所產生的傷害。
呢啲就係小朋友認知範圍入面嘅管理風險嘅方法,風險管理係學習理財嘅重要一環,小朋友要知道風險並唔能夠完全避免,所以做事或者日後作理財投資嘅時候,一定要認清風險,管理風險,減少風險發生所帶來嘅損害。
最後都可以考下佢哋,如果要喺夜晚踩單車,又點樣可以減少意外發生嘅風險呢。

Leave a Reply

Your email address will not be published.