小編耐唔耐就會去啲投資教育講座增長知識,當然都會順便擴闊圈子,識多啲智同道合嘅朋友。嗰個講座本身係收費嘅,美其名係投資致富講座,但其實係要硬銷一個「價值」6位數「天文數字級」嘅皇牌精英培訓課程⋯

小編訪問咗一個比較年輕嘅參加者,廿歲出頭仲讀緊大學,佢話個講座好有啓發性,雖然覺得之後嘅培訓課程有啲貴,但都會想辦法借錢去參加。小編再問下佢自己有冇參加過其他投資課程,有冇上網做過資料搜集,又或者諗辦法去接觸一啲投資者。佢對每一條問題嘅答案都係否定嘅。小編再問下佢覺唔覺得嗰個精英培訓課程嘅內容會係唯一致富嘅方法,而且喺市場上冇人可以做到同樣嘅課程。佢話佢相信課程所提供嘅一定會係市場上最好嘅,佢唔想一開始投資就碰釘,所以寧願攝高枕頭諗方法籌錢都想參加課程。

這個後生仔願意俾六位數字嘅價錢去學習投資,更在所不繼問朋友、家人籌錢。年青人好學係好事,希望學多啲知識改變命運絕對可以理解。政府成日宣傳「先求知再投資」可以講係用心良苦,小編見到呢個年青人咁有求知欲,實在感到安慰;但一諗到佢連好多簡單基本嘅功課、資料蒐集都唔做,反而麻木信任投資課程所推崇,達至財富自由後嘅畫面,小編不禁搖頭嘆息。姑勿論課程本身是否物有所值,理財觀念強調嘅係作出合適的選擇,小編總唔信只有嗰間公司先可以提供相關嘅投資知識同埋培訓,連貨比三家都唔做,做法確實不智。

喺十幾年前,好多人都願意俾幾千蚊買文書處理軟件,咁係因為當時別無他選;時至今日,已經有好多完全免費嘅軟件公司加入競爭,人哋反而會問點解仲要俾錢買軟件呢?科技發達社會進步,獲得知識嘅機會同方法都比以前多,理財知識更加需要與時並進,呢個一直係小編繼續FinKAB嘅動力。

Leave a Reply

Your email address will not be published.