最近係電視上睇到一個銀行廣告,廣告入面嘅男主角係一個年約六、七十歲嘅父親,個心成日掛住嗰個每日為咗份工作不辭勞苦加班嘅女兒,兩父女見面嘅時間自然愈來愈少,個阿爸仲覺得個女好似嫁咗俾份工咁。而個女喺個大約二、三十歲嘅專業人士,事業有成,每日返到屋企已經攰到得番半條人命咁。個女都好孝順㗎,會將家用偷偷放喺阿爸書枱櫃桶入面,個阿爸發現到之後,覺得個女俾太多錢佢,不如將阿女俾嘅錢交俾銀行嘅專業顧問,幫阿女理財啦。呢個廣告打溫情牌,主要都係要推廣嗰間銀行嘅尊貴理財服務。

睇完呢個廣告之後,即刻覺得啲情節熟口熟面,好似經常喺近幾年嘅賣新樓嘅銷售點,都會見到好多父母幫佢哋嘅子女俾首期,擔心佢哋買唔到樓冇地方住。當然天下父母愛錫自己嘅子女正常不過,個個父母都希望自己嘅仔女嘅生活美滿,無憂無慮。但係好似廣告入面嘅父親,同埋嗰啲同仔女一齊排隊買新樓嘅父母,又有冇諗過其他更加好嘅方法幫自己嘅仔女呢?與其幫仔女解決而家眼前嘅問題,有冇諗過其實應該借呢個機會教佢地,又或者應該提供佢哋所需要嘅教育,等佢可以自己解決日後所面對嘅問題呢?呢個世界嘅問題無窮無盡,作為父母又點可能每一次喺佢地遇到問題嘅時候都出手幫仔女解決問題呢?唔通去到七老八十嘅時候,仲要R爆頭諗點樣幫個四五十歲嘅子女解決問題咩?

小編成日強調學習理財唔係淨係學習理財產品嘅硬知識,而係要通過學習理財態度、行為等,他日長大後就會有足夠嘅準備去解決各種理財方面嘅難題。小朋友獨自解決問題嘅能力愈強,日後嘅成就必定會超乎你嘅想像。記住,係要幫小朋友提供學習點樣解決問題嘅機會,唔係喺佢遇到問題嘅時候提供解決方法,呢個先係真正學習嘅原則。