【理財知識】售價最低是王道👑?性價比分析:一

好多人都會認為平嘢冇好嘢,一定有伏,但與此同時亦都知道貴野又唔一定係好,大人去購物時經常會遇到呢啲兩難局面,其實對於小朋友來講呢種概念更加抽象,但係正慢慢影響小朋友嘅價值觀。

首先,小朋友要知道售價(價錢)同埋價值係兩回事,價錢只係商舖喺貨架上標示的數字,消費者一定要按照價錢牌上嘅標價俾錢先可以買到嗰件產品,但該價錢又未必等同我哋心中所願意付出嘅價錢(價值)。例如,同一包零食喺超級市場、雜貨鋪、便利店嘅售價都會唔同,咁係因為每個商舖都會有自己嘅成本(租金、人工、入貨價格、折扣優惠、附近嘅競爭)、利潤嘅考量。

而每個人心入面對於每一件產品願意付出嘅價錢都唔同,有啲人會用較貴嘅價錢去買同一包零食,用多少少錢換來方便、對產品有急切性嘅需要、唔知道/唔介意不同商舖嘅價格差異等。

要比較相同產品嘅價錢當然比較容易,小朋友可以貨比三家,搵出價錢較低嘅作出選購。但係面對唔同貨品,咁又應該點樣作出比較呢?

要知道兩樣同類型產品邊款較抵買,好多人都會用性價比,或者CP值,來作出比較。所謂性價比,就係指產品嘅性能同價錢嘅比例,數值越高代表喺同一金錢之下買到更多產品嘅性能,亦即係比較抵買;相反性價比數值越細代表喺同一價錢之下所獲得嘅產品功能較少,即係比較貴。

性價比分析聽落去比較學術性,應該點樣同小朋友解釋邊樣野係比較抵買?邊樣野唔值得買呢?就以一盒玩具模型車為例,產品嘅性能可能包括:
是否電動?可使用充電池嗎?
是否耐玩?
物料品質如何?
品牌信譽如何?
是否容易裝勘?
外觀設計是否獨特新穎?
需要購買額外配件/工具?等等

因為每次購買嘅物品性能都唔同,要考慮嘅地方亦唔能夠一概而論,所以必須要透過經常向小朋友分析作出購買決定背後嘅原因,漸漸讓佢哋養成在購物前進行性價比分析嘅習慣,從而作出精明嘅消費決定。

Leave a Reply

Your email address will not be published.