【理財知識】什麼是負債?

負債係指一啲尚未償還嘅債務,即係仲爭緊人錢未還。小朋友嘅角度,最常見嘅負債可能係問朋友仔借錢買零食,借錢最緊要係有借有還,按時間依借款條件還清借款,如果小朋友仲細可能仲未知道借錢要付出代價,需要俾利息。咁係唔係應該由細到大向小朋友灌輸負債、借錢係壞事嘅概念呢?小編認為學習理財必須客觀、持平,要俾小朋友每件事情、每個決定都有其利弊。

如果借錢係為咗買啲非必要嘅消費項目或想要的東西,做法實屬不智;咁如果借錢買資產呢?其實都要睇買嘅係邊類資產,先可以決定借錢係好定唔好嘅。如果一面倒咁同小朋友講唔好問人借錢,其實骨子裏大人每日都係向銀行借緊錢買樓、用信用卡消費等,小朋友去借貸嘅觀念更加容易混淆。

如果真係有借錢嘅需要,都要清楚借錢嘅代價同埋條款。例如,小明想向同學A借 $50,同學A可能會提出以下嘅借款條件:「小明,我借俾你都得,不過你要喺未來五個星期一放學之前,要每次還返$10俾我,如果每遲還款一周嘅話,我就會向你收取$2作為利息,直至全部還款為止。」

小明喺借錢之前,必須清楚明白佢有足夠還款能力,可以按照同學A嘅借款條件還錢。而小明要考慮嘅因素包括:要預算未來五個星期一都要有$10還款、評估每星期還款後對自己生活嘅影響、有冇需要調整自己嘅消費模式去還款、有冇預計有其他因素令自己遲還款、是否清楚遲還款嘅利息等。

Leave a Reply

Your email address will not be published.