物業投資對好多人嚟講一啲都唔陌生,因為貪佢可以「財息兼收」,即係物業本身會長遠增值,即係物業會為你帶嚟租金收入,而且仲會因通脹而上升,非常和味。但係每次同朋友講起投資外國樓,佢地一定會灑手擰頭,又話隔山買牛,又話風險高,又話賺得果雞碎咁多等等。今次就同大家分析一下投資外國樓有啲乜嘢好處先。

一、分散地區風險丶分散注碼

香港樓市水漲船高,經常升破記錄,其實風險好大。雖則話啲發展商出口術話樓市冇泡沫好健康,唔可以同97年嘅時候比較,但係作為精明嘅投資者、消費者,點解硬要將啲錢同埋投資物集中哂喺一個籃,又唔將啲蛋放喺唔同嘅籃呢?再加上外國樓銀碼較香港樓細,泰國樓由港幣六、七十萬起,英國樓由百五萬起,可以將注碼減少同地區風險進一步分散。

二、不受香港高樓價、政府辣招影響

喺香港買第二層以上嘅物業會俾政府各項嘅辣招限制,你要俾多好多嘅印花稅同埋首期支金,亦即係加大咗投資成本,先可以得到只有2.x%嘅回報率,唔係咁化算。相反,仲有好多其他國家嘅買樓税項仍然比較簡單,仲未有辣招,所以可以減低你嘅購買成本。

三、善用各地銀行按揭貸款,增加借貸力

宜家喺香港借錢買樓嘅門檻越嚟越高,投資者要左度右度,又要通過信貸力、金管局要求嘅壓力測試,先可以申請到按揭貸款。但係如果你經過當地銀行申請外國樓嘅按揭,佢地唔會查到你喺其他國家嘅信貸狀況,所以變相避開咗壓力測試,同增大你嘅借貸力。咁循例都要講句,借定唔借,還得到先好借。

四、更多多元化物業投資選擇

礙於香港物業嘅法例丶租住屋需求嘅限制,喺香港可以投資嘅物業種類同管理方法始終有一定限制。當你放眼海外,你會發現其他國家會有更多元化物業投資選擇,例如:酒店、度假屋、學生宿舍、保證回報代租代管計劃等,可以更加迎合唔同投資者嘅需要。

五、較易發掘發展潛力高嘅地區

習大大嘅一帶一路大計一出台,鄰近嘅國家紛紛向中國招手,歡迎中國嘅各項投資大計同合作大計。好多受一帶一路影響而發展潛力高嘅地區丶國家會因為日後嘅商機而續漸升值,投資者可以多啲留意一啲樓價落後但具有增值潛力嘅筍盤。

六、為小朋友升學丶退休作準備

正當香港人喺度擔心香港日後嘅政治前途時,其實都可以投資外國樓作兩手準備,一方面趁年輕時借貸力強而為退休時作儲備,另一方面亦可以為小朋友日後喺海外升學作打算,反正去外地讀書亦要搵地方住,與其交租養肥業主,不如買樓先投資後自用。

七丶吸取強美元所帶嚟嘅外匯機遇

喺可見嘅將來,港幣都應該會繼續同美元掛鉤,其實作為喺香港打工嘅我哋,應該要好好諗下將自己辛苦賺返嚟嘅錢,放眼海外,睇吓有冇更加好嘅投資選項。強美元真正可以為我哋帶嚟好好嘅機會,特別係用港元去兌換世界各地嘅貨幣而投資海外嘅房地產,計落咁樣會更加化算。

八丶其他好處(免費入住數天、免費會籍)

而家最近投資係海外嘅房地產,特別係酒店和渡假村項目,會經常為買家提供每年指定數目嘅免費住宿,甚至乎係哥爾夫球會或遊艇會嘅免費會籍。呢啲嘅好處將會更進一步提高投資項目嘅回報率,係身處香港打工嘅同時,一有假期就可以去海外渡假。