唔好講外國樓啦,我哋淨係睇翻喺香港嘅新樓盤廣吿,個個盤都面對住翠綠山景、醉人維港夜景、萬里無人丶旁若無樓丶身材高挑郎才女貌嘅外籍模特兒把酒談心、細路喺綠油油嘅草地奔跑,當然唔少得貫穿成個廣告、啲字體細過米雕嘅「建築師構想效果圖」。查實大家都心裏有數,邊得嚟咁多無敵海景吖。樓盤廣告上嘅畫面,的確充滿味精,充滿電腦CAD嘅效果,更何況係連地基都可能未打嘅外國樓花呢?咁作為投資者,點先可以確保自己買緊嘅樓同幾年後收樓時嘅喺一樣呢?

如果有心投資某一城市、地區嘅話,都會建議大家飛一轉睇吓個樓盤附近嘅環境,居住環境、住屋租賃需求嘅實況丶民生生活機能丶交通配套、教育醫療設施丶與商業工廠區嘅距離、鄰近新樓嘅落成量等等。最實際嘅就係去當地嘅地產代理問吓價,一係問吓你想買嘅附近同類型單位嘅售價,二係問吓單位嘅實際租金同埋供應量。聽落好似好煩,但係而家部份發展商都會安排睇樓團,費用可以係售價扣除,變相免費旅遊兼可以睇睇樓盤周圍嘅真實面。就算唔買,咪當去一次考察,了解當地行情增長知識。除咗跟住睇樓團嘅指定景點之外,都會建議大家自己去附近周圍行吓體察民情,同佢傾吓計、觀察下當地人嘅生活實況,更加貼地咁考察。

如果工作繁忙嘅你真係行唔開,真實好多口碑好信譽好嘅發展商都已經用咗新科技幫手,例如用航拍機去令到身在海外嘅投資者可以多角度了解樓盤嘅外貌同周圍環境,了解喺唔同樓層所見到嘅實際景觀。亦會用到VR虛擬實景(Virtual Reality)睇到唔同類型單位嘅間隔、裝修設計、傢俱擺設等,唔使再單靠平面圖丶幾張相估估吓。投資者唔使飛就可以好似置身樓盤嘅單位入面,體驗一吓新盤落成後嘅感覺。而喺幢樓起緊嘅時候,個別發展商仲會定期喺網頁上載每個建築期內興建進度嘅航拍影片,等你在外地都知道樓盤係咪可以如期完工。