定立儲蓄目標;先儲蓄,後消費

唔少家長都擔心小朋友一有零用錢就會一次過洗晒,所以只會一味叫佢哋將全部零用錢儲起,或者上繳中央,由父母代為管理,到大個時先俾返佢哋。將零用錢只儲唔使有入無出,冇機會係消費時做決定,其實係學唔到管理金錢嘅。

小朋友每次收到零用錢後馬上決定儲蓄嘅金額/比例,並將呢部分放喺安全嘅地方儲起。其餘部分可以分配用嚟買小食飲品、想要嘅文具書籍、慈善捐款等。例如每星期零用錢有$20 ,可以儲起 $8為長期儲蓄, $4買零食,$6買文具,$2捐款。每項嘅比例可以同小朋友一齊討論,但係都需要尊重佢哋嘅最後決定,重點係決定咗比例之後就要按計劃執行儲蓄計劃,要消費嘅時候就必須量入為出,唔可以喺長期儲蓄嘅部份隨意攞錢出嚟消費。

大家可能會覺得其實零用錢得$20唔係好多,做乜要咁麻煩又要做預算、又要記帳呢?但係大家千祈唔好睇少預算背後嘅意義。
一、長期消費嘅項目係要靠每星期儲錢得來嘅,冇付出就唔會有收穫,小朋友亦都會特別珍惜自己辛苦儲蓄買返嚟嘅嘢,學會感恩。
二、每次消費都必須量入為出,睇下自己手上嘅資源有幾多,喺眾多誘惑之中作出精明嘅消費者選擇。如果真係好想買嘅話,就必須要等待,儲夠錢先買。話唔定佢諗多幾星期,發覺其實自己並唔係真係咁想要嗰件文具呢。
三、自己定落嚟嘅目標必須按計劃完成,亦要承受返自己所做決定嘅後果,培養有責任心、有擔當嘅品格,也要定期檢討計劃或作出適當調整。

Leave a Reply

Your email address will not be published.