上次教班小四學生理財嘅時候,用咗個薯片嘅例子去同佢哋分析購物嘅時候,要多角度去思考問題。嗰問題係要佢哋喺以下兩者之中二揀一:第一係一包大嘅薯片,而且保鮮日期仲有三個月;第二係兩包細嘅薯片,淨重量比一包大嘅薯片略重,雖然售價同大嗰包薯片一樣,但係聽日就到期啦。我想睇吓佢哋喺考慮問題嘅時候,會唔會多角度地從食物嘅淨重量、售價、性價比、食物新鮮度等方面去作出一個平衡嘅選擇。
結果發現選擇一同二嘅小朋友各佔一半,跟住我就訪問佢哋,睇下佢哋有啲咩睇法。揀一嘅朋友話寧願俾貴少少,但係認為薯片會比較新鮮,較有保障。選擇二嘅朋友就將着眼點放喺薯片嘅售價,覺得兩包細薯片比一包大薯片仲要多少少,比較抵買,只要係聽日之前食晒啲薯片,咁就冇問題啦。兩組同學嘅分析都不無道理,佢哋都追問我正確答案係乜嘢呢,我同佢哋講其實日常生活中,特別係對於消費嘅時候,並沒有絕對嘅啱同埋錯,選擇一嘅小朋友比較着眼喺食物嘅新鮮度同埋健康方面,選擇二嘅小朋友比較着重售價,只是喺指定日期前食晒,選擇平嘅就得嘞。咁你嘅小朋友又會點揀呢?下次同小朋友買嘢嘅時候不妨先問一問佢嘅意見,跟住再喺旁邊提問,刺激佢嘅思維。